The Names – فريق التحرير
انتصار عن فكرة زواجها مرة أخرى: ما عتزلتش الرجالة لكن مافيش وقت
نفت النجمة المصرية انتصار فكرة زواجها مرة أخرى بعد انفصالها عن والد ابنتها، مؤكدة أن مشروع الزواج لا يزال موجودا، لكنها لا تجد الوقت المناسب للتفكير بسبب انشغالها الدائم في العمل في المجال الفني والتزاماتها في المنزل.
وقالت أن الزوج مع الوقت يصبح طفل صغير يحتاج دائما إلى رعاية خاصة، كما أنه يحتاج إلى مجهود مضاعف خاصة مع تقدمه في العمر، وأشارت إلى أنها تفضل حاليا أن يطلق حاليا لقب “ممثلة كوميدي” على الرغم من أنها “نكدية” في المنزل.
وأضافت انتصار خلال لقائها الإعلامي في برنامج “كلمة أخيرة” المذاع عبر قناة “ON” والذى تقدمه الإعلامية لميس الحديدي قائلة: “ماعتزلتش الرجالة لكن مافيش وقت، إما أكون ست عاملة وإما في البيت خاصة أنى ست عاملة في مجال صعب وفيه تنافس، بيشفط الوقت والعمر لأنى مش مجرد موظفة بس بروح الصبح أمضى وأرجع”.
وأكملت حديثها قائلة: “24 ساعة شغالة حتى وأنا في البيت على طول في وضع تنافسي طول الوقت، حتى في البيت بنتابع لصقل المهارات وغيرها”.
وردا على سؤال وجهته الحديدي هل الرجل يشفط الوقت قالت: “كل الوقت، ومش حكاية تجربة شخصية فقط لأن الست بتتحول بعد الزواج لأم الرجل وعاوز في البيت يبقى الابن الكبير بعد أولاده، وبالتالي الست بتتفاجأ أن بقى عندها زوج زي ابنها الكبير عاوز إللي يأكّله ويشرّبه ويسمع همومه ولازم الست تكون طول الوقت كده”.
وتابعت: “الوفاق من عند ربنا محدش ضامن نفسه لأن الوفاق والود زي السر بين الاثنين فجأة بعد الهدوء ممكن ينتهي الوفاق، الزواج مكتوب والطلاق برضه مكتوب بمواعيد”.
وعن الصفات التي لا يمكن أن تتقبلها المرأة في الرجل قالت: “البخل أولاً ثم الكذب والخيانة، والبخل في المرتبة الأولى؛ لأنه ليس بخل مال فقط، بل أيضاً مشاعر، لما اتجوز راجل بخيل هديله مشاعر إزاي؟ وأنا مش مستخسرة فيه حاجة”.
وأشارت انتصار إلى أنها ترغب في تقديم الأعمال الكوميدية، مؤكدة أنها تفضل تصنيفها كممثلة كوميدية، وأضافت: “الناس فاكرة إن الكوميدي بس بيضحك الناس وبيقول إفيهات على المسرح مثل عبدالمنعم مدبولي وسهير الباروني وسهير البابلي”.
وتابعت: “الممثل الكوميدي يعني إنه خلص كل شيء في التمثيل وبقى عنده موهبة كمان يضحك الناس ودي صفة وتخصص مش موجود كتير في العالم”.
واصلت انتصار: “الممثل الكوميدي نكدي أوي ويعجبك في النكد، وفي نفس الوقت يسخر من أحزانه ويضحك عليها.. وأنا في حياتي الشخصية عندى حتة نكد كده موجودة بس مش قدام الناس في البيت، بس لكن بمجرد خروجي من البيت هتلاقي الضحك كله”.
وتابعت: “وأكتر وقت بكون نكدية فيه لما بكون مزنوقة وعندي مواعيد تصوير وغيره، بالإضافة لالتزامات البيت، فأنا هنا بلعب دور الأم والممثلة والمسرح ومديرة أعمال نفسي وبروح أدفع مصروفات المدرسة وأحضر اجتماعات أولياء الأمور في البيت وبروح السوق”.
واختتمت انتصار: “نكدي بيطلع لما بلاقي المواعيد دخلت في بعضيها تصوير وشغل مع مواعيد المدرسة والمذاكرة، صحيح الولاد كبروا بس في ساعات بيبقوا مش عاوزين يصحوا للمدرسة أو يقفلوا التليفون أو مخلصين الواي فاي في البيت وغيرها أو مش عاوزين يروحوا التمرين”.
